O le malaga taamilo a le The Big BallerVerse lea na afea ai Ausetalia, Niu Sila ae o lea na afea ai ma Samoa, ma oo atu ai i Samoa le alii ta’uta’ua i le taaloga lakapi Amerika faapolofesa ae ua malolo litaea ma ua avea nei ma alii faipisinisi LaVar Ball, o ia foi o le CEO ma o le Founder o le Big Baller Brand (BBB), o se kamupani e saunia lavalava taalo.
O LaVar Ball o le tamā lea ma le faiaoga mo lana fanau tama e toatolu o loo iloga foi i le taaloga pasiketipolo, o Lonzo Ball, LiAngelo Ball, ma LaMelo Ball.
O le oo atu o le malaga taamilo a le Big BallerVerse i Samoa, o se avanoa faaauro mo fanau a Samoa o loo naunau i le taaloga pasiketipolo e maua ni a’oa’oga a o ni taiala e tapu’e atili ai lo latou tomai i lea taaloga mai se tasi o tagata ta’uta’ua i taaloga i lea foi itu o le lalolagi.
O le malaga taamilo lenei sa faaautu i ni toleniga sa faatino e LaVar Ball na fai ai ma ni faatauvaga (3-on-3), ina ia maua e fanau taaalo le avanoa e faaali ai o latou tomai ua iai i le faatinoga o le taaloga, ae o se avanoa foi mo le alii ta’uta’ua e na te matauina ai vaega o le tomai o nei alo o le atunuu e faaofi atu ai lana fesoasoani mo i latou.
E pei ona lipotia i le Samoa Global News, saunoa LaVar Ball, ‘e matua toatele alo o Samoa o loo iai le taleni i lea taaloga, ma o le faamoemoe lea o le latou malaga taamilo, ia sailia tama taaalo e sili ona tomai ina ia latou aveina i Amerika ma tofo ai i le nofoaga o loo matuā iloga ai foi lea taaloga.
Sa viiviia e LaVar Ball le taleni o alo o Samoa, aemaise lo latou tinou ma le malosi o le faatinoga o a latou taleni i aso uma e lua na faagasolo ai a’oa’oga, mai le aso 5 – 6 Aperila 2023.
O lenei malaga taamilo ma le faasoa mai a lenei foi tagata ta’uta’ua i taaloga, ua le gata ina a’oa’o ai e fanau taaalo tomai fou i le auala e faatino ai le taaloga, ae o tomai e mafai ai ona latou fesaga’ia lu’itau o le olaga ma faaleleia atili a latou taaloga i aso taitasi. Sa faamamafa le tāua o le self-disciplined ma le self-confidence, e lē na o le taimi e taaalo ai i le pasiketipolo, ae i le olaga i aso taitasi.
O le Gym2 i Tuanaimato, i le nofoaga o taaloga i Faleata lea na faia ai se sauniga e tatala ai le faamoemoe, ma faagasolo ai loa le a’oa’oga e pei ona galulue faatasi ai le Samoa Basketball Federation and Southwest Basketball, ma i latou uma o loo iai i le taaloga pasiketipolo i Samoa.
Ata: Miss Samoa Pageant fb.
