O le aumalaga a fanau Samoa mai Niu Sa Uelese i Sini Ausetalia na taunuu mai i le Aso Faraile, 8 o Tesema i laufanua o Aukilani.
E 30 le aumalaga a le aulakapi na malaga mai e aofia ai tamaiti aoga faatasi ai ma le pulega o le ‘au.
O tamaiti uma e i lalo o le 18 tausaga le matutua, ma e eseese afioaga o fanau i Samoa e iai piitaga o latou mātua, ma o se fiafiaga lea o fanau o le malaga mai i Niu Sila ae fiafia e tauave igoa o latou nuu i Samoa.
O le aulakapi a le New South Wales Samoa sa siamupini i le taamilosaga o aufili a le Pasifika sa faia i Sini e aofia ai atunuu eseese o le Pasifika, ma o le ala lea ua a’e ai se lagona o le pulega o le ‘au, ua tatau ona sau se tafaoga a le aulakapi se’i sami ai le siamupini o taumafaiga a fanau Samoa i lea foi taamilosaga tele i Ausetalia.
Na o le faaiuga o le vaiaso le umi o le faigamalaga, ae ua fetaui le taunuu mai i le Aso Faraile a o loma ai le taitoafitu a le Moana Pasifika lea sa faia i Otahuhu i le Aso Toonai, ma o lea sa maua ai foi le avanoa e asiasi atu iai se’i maimoa ai fanau i le taaalo a fanau Pasifika i Niu Sila ma lagolago foi i taumafaiga a le susuga ia Faalogo Tana Umaga ma le latou ‘au.
Sa faafiafiaina le ‘au atoa ina ua taunuu mai i Niu Sila ma suia ai foi le latou matamata i le ea ma taaloga sa faatinoina i le faaiuga o le vaiaso, aemaise lava i fanau o le latou taimi muamua lea ua asia ai laufanua o Aotearoa.
O le Aso Sa ananafi na taaalo ai le New South Sales Samoa mai Sini ma le ‘au a Kelston Boys ona toe taliu ai lea o le aumalaga i le afiafi lava ananafi.
