O le tāua o le malamalama ma silafia vaega uma o loo faafoe ai galuega a le Fono Aoao Faitulafono o le Malo Tutoatasi o Samoa, o le autu lea o le asia maota fono o le Palemene i Mulinuu e le aumalaga o tupulaga talavou o le Ekalesia Faapotopotoga Kerisiano Samoa mai Magele i Sasa’e i Niu Sila, le EFKS a Puaseisei, a o iai i Samoa le autalavou i le fono tele i Malua.
Ua faailoa e le ofisa o le fono i se pepa o faamatalaga faalauaitele i auala o fesootaiga televavave a le ofisa, o le susuga i le faafeagaiga ia Victor ma le faletua o Salome Pouesi na taitaia le asiasiga a le autalavou.
O se avanoa tāua mo alo ma fanau o loo soifua i Aotearoa e molimauina ai le anofale o le Maota Fono o Samoa mo faamoemoega o le tapueina latou malamalamaaga i le faatinoina o galuega fai a le Fono aoao, aemaise o matafaioi autu a le Palemene o Samoa.
O ofisa sinia o le ofisa o le fono o loo gafa ma galuega fai i taimi e tauaofia ai le fono usu a Samoa, sa latou faamatala vaega eseese mo le silafia e le aumalaga.
E iai le talitonuga o avanoa lē aumaua faapea mo tamafanau talavou a Samoa sa ola ma soifua a’e i atunuu i fafo, o le a maua ai lo latou silafia i vaega eseese o loo faafoe ai fonotaga a le Palemene o le tatou atunuu.
