O le silia ma le 30 sui o le polokalame ua faaigoaina o le Young Pacific Leaders o i latou mai atunuu o le Pasefika lea na asia le ofisa o polokalame a le siosiomaga i le Pasefika le Secretariat of the Pacific Regional Environmental Programme (S.P.R.E.P.) i lona ofisa tutotonu i Vailima.

E tusa ai o le faagasoloina o le polokalame faaleaoaoga lenei a le Y.P.L. i Samoa nei o loo iai nisi o mataupu o loo faasoa ai sui auai e aofia ai le siosiomaga ma suiga o le tau.

O le asia ai o le S.P.R.E.P. o le faatinoina lea o se aoaoga e sui mai lea ofisa i vaega tau i le suiga o le tau ma faia ai se aoaoga i tulaga tau i maliega ua mae’a faataatitia i soo se vaega e aofia ai le siosiomaga.

Na faaalia ai e nisi o loo iai le tomai faapitoa o loo faapea ona galulue i lenei ofisa le tulaga o suiga o le tau i sona faamalamalamaga faigofie aemaise o le faailoa lea o nisi o tulaga o loo aafia ai le Pasefika mai nei suiga.

O lenei aoaoga o loo faafoeina lea e le Ofisa a le Malo o Amerika i Samoa nei ma o lenei polokalame o loo auai ai sui mai le Pasefika e talanoaina ma faasoa foi nisi o mafaufauga ma lagona i vaega eseese o loo faapea ona aliae mai i atunuu o le Pasefika e siitia ai le tomai i mataupu eseese ma silafia ai le tulaga e ao ona faatino ai se fesoasoani i ni aafiaga o loo tutupu i le Pasefika.