E tolu aoga a le atunuu na asia e le Tamaitai Palemia, o le Minisita o le Soifua Maloloina, Minisita o Aoga Taaloga ma Aganuu faapea Komiti o Faalavelave Faafuasei i le vaiaso na tea nei lea ua faasolo ai tūiga mo le vaega o le 12 tausaga agai i le 17 tausaga le matutua.

I le feiloaiga a Tusitala ma le tamaitai Palemia i le vaiaso na tea nei na faamanino ai e le afioga Fiame Naomi Mataafa le taua o le faia o tui puipui o le Koviti19 a fanau laiti. 

“Sa mafai ona matou asia le aoga i Pesega a le Ekalesia Mamona ma faaauau atu ai lea i Aoga Tulagalua i afioaga Malie ma Afega. O le fesoasoani lenei o tui mo le vasega lea 12-17 tausaga o loo fesoasoani mai ai le Mālō o Niu Sila ma o le faamoemoe ina ia mafai ona ausia tūiga mo lea vaega o le tatou atunuu”.

I faamaumauga i le taimi nei a le Matagaluega o le Soifua maloloina mo le vaega 12-17 tausaga le matutua ua oo atu i le to’a 8,000 ua mafai ona fai tui ae o le fainumera o loo tuliloa nei e le Matagaluega i lea lava vaega o le to’a 27,000 i le to’a 30,000 e tatau ona fai o latou tui puipui o le Koviti19.

Taua foi e le tamaitai Palemia “ e maitauina e ono tapuegofie le fainumera o loo moomia i le vaega lea mo fanau aoga ona o lea e mafai ona fesoasoani ma galulue faatasi le Soifua Maloloina ma le Matagluega o Aoga i le faagasologa o lea vaega”.

O lenei polokalame o le faia o tui puipui o le fanau e aofia ai uma aoga a le Mālō, o Aoga a Ekalesia ma Aoga Tumaoti ma o le sini autu lava ia ola saogalemu fanau a le atunuu ma tetee atu i le ono aafia o Samoa i le vairusi o le Corona.

Ae i faamaumauga mo tagata matutua o lea ua oo atu i le 94% o i latou ua faia tui muamua ae ua 67% tagata ua maea atoaatoa a latou tui puipui. O loo faagasolo pea tūiga mo vaega matutua ina ia maea atoaatoa le faiga o tui o tagata o le atunuu.