Ua fa’atino ai nei se sa’ili’iliga ua aoina ai ma fa’amaopoopo fa’amatalaga uma mai tagata Samoa o alala ‘aitau malele i fafo, i le fa’amoemoe o le malo e toe tatala malaga a le kamupani va’alele o le Samoa Airways mo atunu’u i fafo.

O fa’amatalaga o le a aoina mai o le a lima ta’ita’iina ai se faai’uga i le toe tatala o ia malaga e fa’a’aoga ai ni va’alele tetele. O le sa’ili’iliga ua na o mo le aoina o fa’amatalaga ma ua iai se fesoota’iga i upega tafāilagi e mafai e so’o se tagatanu’u o Samoa i fafo ona fa’aaoga e ala i le taliina o fesili o loo iai.

Ua fa’ailoa i se pepa o fa’amatalaga fa’alauaitele mai le malo o le a le mafai i le sa’ili’iliga ona avea o se auala e aumai ai ni tupe, ae o le a mulimulitaiua ala o le tulafono i le lumanai e fa’atino ai lea tulaga ina ia usita’ia ai tulafono a le atunu’u lava ia.

E pei ona silafia o le amata fa’ailoaina e le malo o le toe tatala o ia malaga faavaomalo sa avanoa ai o tatou tagata i Samoa ma atunuu i fafo e tu’uina mai seleni i le aofa’iga e lima selau tālā e avea ma o latou sea e teu fa’afaigaluega mo le aumaia o se va’alele tele mo ia malaga, peita’i o lea ua fa’atino le sa’ili’iliga e aoina ai fa’amatalaga o tagata Samoa i fafo, ae mulia’i i se tapenaga faaletulafono mo le itu tau tupe.