O le taeao nei lea na amatalia ai se aoaoga mo tusitala aemaise fanau o loo a’otauina i le polokalame faatusitala i le Iunivesite Aoao o Samoa i le tulaga o le faaitu’au o lipoti.
O lenei aoaoga sa tatalaina aloaia i se saunoaga a le Sui o le Faalapotopotoga o Tina ma Tamaitai a le Malo Aufaatasi i Samoa, Papalii Mele Mauala.
“E telē se pasene o tamaitai o loo galulue i totonu o le galuega Tusitala ma Faasalalauga i totonu o le atunuu ma o se tulaga lelei lea.
“Ma e ao ai ona avea lea ma vaega e ogatusa ma a tatou lipoti ia tutusa ina ia aua ne’i iai se faaitu’au.”
Na ta’ua ai e Papalii e le aumaua e isi atunuu le tulaga o iai le faatinoina o galuega faasalalau i Samoa, o loo iai le saolotoga e faatino ai lenei auaunaga i le atunuu.
“O le naunautaiga foi lea ina ia mafai ona faia lipoti ia tutusa tusitusiga e faia i alii ma tamaitai ia aua lava ne’i iai se faaitu’au.
“O le mataupu lenei i ituaiga tutusa e fai lava sina ma’ale’ale i le lalolagi atoa ma e ao ina foia e ala lea i le moni ma faamaoni o tusitusiga.”
