O le gataifale lauoneone pa’epa’e o loo lumafale iai le faletalimalo o le Amoa Resort i le afioaga o Faga i Savaii, o le a faia ai le faaaliga o mea faapāpā poo fireworks, i le po o le Aso Toonai le aso 31 o Tesema e faafeiloai ai i le vaeluaga le tausaga fou 2023.

O le faato’ā faia lea o se faaaliga faapea i lo tatou motu tele i Salafai, talu mai tausaga e tele ua mavae ina ua faia polokalame e faatupe e le Malo, e faafeiloai ai le tausaga fou.

Ua faailoa e le sui o le komiti o loo tapenaina faafiafiaga ma polokalame mo le kirisimasi ma le tausaga fou le susuga Fanaea Natu Taule’alo ua filifilia le Amoa Resort ona e tele le nofoaga i luma o le gataifale o le pitonuu o Siufaga o loo iai le faletalimalo, e mafai e tagata e toatele ona maimoaina ai le faaaliga o mea faapāpā. Na fesiligia le nofoaga ona o le pepa o le faaiuga a le Kapeneta o loo faailoa ai o mea faapāpā mo Savaii e faia i Salelologa.

https://l.facebook.com/l.php?u=https%3A%2F%2Fwww.podbean.com%2Fplayer-v2%2F%3Fi%3Dahbe5-133cd7f-pb%26from%3Dpb6admin%26share%3D1%26download%3D1%26rtl%3D0%26fonts%3DArial%26skin%3D666666%26font-color%3Dauto%26logo_link%3Dnone%26btn-skin%3Dff6d00%26fbclid%3DIwAR1ze-70zG6W29pCJnHFvTyYgCEAeY9JAFsa733cg1Rrgj4PekxXB6F407c&h=AT1BhM0rK4bYz576YYYKfD0ki4AiF0PppQQO_bynN-hADolli6PM1j69DnLI95nL37fhTI4MaScZOP8g84MCFKKGpOjE84A4TT06ypGi7E4B0IGnK4Rw5FPfeROwoplqCYT3mCYK

Le sui o le komiti susuga Fanaea Natu Taule’alo o se tasi o ofisa sinia o le Pulega o Tagata Tafafao.

O mea faapāpā i Upolu o le a faia i luga o se vaa i gataifale o le taulaga o Apia. O le kamupani Niu Sila o le Van Tiel Pyrotechnics lea na tapenaina mea faapāpā o le tausaga na tea nei o le a toe faia lea galuega.

O le tau o mea faapāpā e $78,171.40 sene tupe Niu Sila. O le tau o le aumaia i le vaa e $40 afe tālā Niu Sila, ma le totogi o pasese o le vaalele e malaga mai ai tagata popoto faapitoa e gafa ma le faia o mea faapāpā e 16 afe tālā Niu Sila.

O ia tau uma o loo faailoa i se pepa o faaiuga a le kapeneta na pasia ai le faia o lea polokalame e le gata mo le kirisimasi ae o le faafeiloa’i o le tausaga fou.