O le taeao nei na amata ai se tasi o vaega tāua mo le sailiga o se tausala o Atumotu o le Pasefika e ala i faatalatalanoaga amata poo Pre-Pageant Interviews a o loma ai le tauvaga autu i le aso a taeao.
E toalima tamaitai lalelei mai le Pasefika e aofia ai ma Samoa o le a saili ai se tausala o Atumotu o le Pasefika 2023, ma o a latou faatalatalanoaga i le taeao nei sa tuu ai i tamaitai tauva le avanoa e faasoa ai i ulutala na o latou filifilia.
O le tausala numera tasi o le Lalelei o Nauru le tamaitai o Alexandra Melody Pitcher lea na faasoa i le itu tau Soifua Maloloina (Health). Na faatāua e Alexandra le aafiaga o atumotu o le Pasefika i le faamai o le Koviti ma na ave lana faamamafa i le tāua tele o le ola soifua maloloina i le olaga o le tagata.
O le tamaitai o Kauhani Meaalofa Teisa Fuimaono o le tausala mai Amerika Samoa o le sui tauva lona 2 foi lea o le tauvaga na faasoa i le ulutala o Fesuiaiga o le Tau (Climate Change). Ta’ua e Kauhani i lana faasoa o le fesuiaiga o le tau o se tasi o mataupu ua leva ona finau iai le Pasefika ae mo lona atunuu o Amerika Samoa o se tasi o faafitauli o loo feagai ma latou o le siisii lea o le tai poo le sea level rising. Na ia ta’ua foi o le galuega a le malo o Amerika Samoa o loo faatino e tali ai lenei faafitauli o le fausia lea o taligalu faapea foi le faia o aoaoga ina ia malamalama le atunuu o Samoa i aafiaga o le fesuiaiga o le tau.
O le tausala o le Atu Solomona o le sui tauva lona 3 le tamaitai ia Tiare Haro na faasoa i le ulutala o mataupu tau Turisi (Tourism). Na faailoa e Tiare o Tagata tafafao maimoa mai fafo o le puna autu lea o tupe maua a atumotu o le Pasefika. E le gata i lea na ia faatāua le aano tonu o mataupu tau turisi, e le na o le malaga i le vaalele ae o le amanaiaina o vaaiga eseese i totonu o se atunuu, e le gata o le siosiomaga lanu meamata, o meaai eseese ae faapea tu ma aganuu a le Pasefika.
O Haylani Kuruppu le tausala o Samoa o le sui tauva lona 4 lea na ia faasoa i mataupu tau i Tekonolosi (Technology). I le faasoa a Haylani na ia faailoa ai le tāua o Tekonolosi i soo se vaega i lenei vaitau, e ala i le itu tau aoaoga, o le itu tau soifua malolona, o tu ma aganuu ae faapea le siosiomaga. Na ia talanoa foi i itu e lelei ma lē lelei ai tekonolosi ma o le galuega faitele lea a tagata o le filifili lelei o itu e tatau ona mafuli iai le lagolago. O se faataitaiga o le itu lelei e fesootai ai ma aiga, e aoaoina ai i nisi mataupu e faatatau i le aganuu a Samoa ae faapea le Pasefika.
Ma le tausala faai’u le tamaitai ia Josie Nicholas o le avefu’a a Papua Niu Kini lea na ia talanoa i mataupu tau Aoaoga (Education). Na faailoa e Josie le tāua tele o Aoaoga i le olaga o le tagata ma a aunoa ma aoaoga e le mafai ona faamanuiaina ma maua galuega lelei. I lana folasaga na ia faamamafa ai, o aoaoga e aumaia faamatalaga ma o faamatalaga o se vaega aupito isi ona tāua i faiga faaiuga a le tagata soifua.
O le aso a taeao 3 o Fepuari o le a faataunuu ai loa le tauvaga autu mo le sailia o se Tausala o Atumotu o le Pasefika 2023 ma o le a faataunuuina i le Faletaalo le Gym 1 i Tuanaimato.
