Ua amata usuia i le Aso Lua o lenei vaiaso le fono a sui o atunuu Aferika, Kerepeane ma le Pasefika, ma le Iuni a Europa a o lei sainia i le Aso Lulu le maliega ua faaigoaina o le Samoa Agreement.
Ua tele ina taunuu i Samoa sui o atunuu e 106 mo lea faamoemoe tāua, peitai e iai atunuu e pei o Jamaica ma Namibia ua lipotia le toe solomuli mai lē auai i le sainiga o le maliega.
O le feiloaiga a tusitala ma sui sooupu o loo tuufaatasia le sainia o le maliega o le a iloa ai pe o aofia uma atunuu i le sainiga o le maliega lea e fesootai ma le faasafuaina atu o fesoasoani a le Iuni a Europa mo le fausia o atinae mo le faaleleia ma le siitia o tulaga i le tamaoaiga ma le soifua lelei o tagata o atunuu Aferika, Kerepeane ma le Pasefika.
O le taitai o le Malo le afioga i le Tamaitai Palemia o le a saunoa e tatala le faatasiga lenei a o lei sainia le maliega o le Samoa Agreement.
