O le Aso Gafua le amataga o lenei vaiaso fou, ua amata ai tuuga vaa alo paopao e pei ona auai mai ai le 28 o atunuu o le lalolagi, e le gata o atunuu o le Pasefika a o au mai atunuu Europa.
O le ‘afa o le fitu i le taeao o lenei Aso Gafua le tuuga muamua e pei ona faatulaga mai i le polokalame.
E tolu tuuga o le aso muamua ma e mae’a ma faia ai lava ma tufatufaga faailoga i le afiafi.
O le Aso Lua e faapena foi ona faagasolo tuuga vaaalo paopao seia oo lava i le Aso Toonai nei o le a taualuga ma tapunia ai.
O le afioga i le tamaitai Palemia le afioga Fiame Naomi Mataafa na saunoa e tatala le tuuga vaa alo paopao faavaomalo o se taimi muamua ua talimalo ai Samoa i lea faamoemoe.
O loo iai le naunautaiga o le komiti o tapenaga ma kalapu a le auvaa alo paopao a Samoa, e faalautele atu le aoaoina o lenei taaloga i tupulaga o nuu ma afioaga o le atunuu ina ia faatuputeleina ai le agaga o le fia auai ma tausinio i tauvaga faavaomalo o le lumanai.
