O le ogatotonu o le vaiaso lona lua lenei o le masina amata o le tausaga fou 2023, ua amata ai ona faagasolo le lesitalaina o suafa o tagata palota ua agavaa mo le palota laititi a le itumalo faapalota o Vaimauga Numera 3.

O lea galuega o le a gafa ma le ofisa o le komisi o faigapalota ma o le nofoaga tutotonu o lea auaunaga a le Malo i Mulinuu o le a faia ai lesitala mo le Aso Lulu 11 o Ianauri e oo i le Aso Faraile 27 o le masina nei lava.

E iai le galuega o le lesitala faapitoa mo tagata palota o le itumalo o le a faasavali i nuu ma afioaga e aofia ai, Faatoia, Vini, Maagao, Magiagi, Magiagi-Uta, Lelata, Matautu-Tai ma Matautu-Uta, Leonē, Vaisigano, Vailima, Vaoala, Afiamalu, Afiamalu i Sisifo, Papaloloa, Papauta, Tanugamanono, Tiapapata, Avele, Nafanua, Tanumaleko, Malololelei ma Tiavi.

Ua faailoa e le ofisa o le komisi o faigapalota e ao i aiga uma o nei nuu ma pitonuu ona nonoa se ie pa’epa’e i luma o o latou laoa ma maota ina ia iloa gofie ai e le aufaigaluega e iai tagata o loo fia fai a latou lesitala mo le lola palota a Vaimauga 3.

O le mae’a o lenei galuega i le aso 27 o Ianuari o le a tapunia le tumau ai le lola palota a lea itumalo, ma sauni ai i le palota laititi lea ua iai le talitonuga o se aso o le masina fou o Fepuari e tatau ona faatino ai.

O le aso 29 o Novema o le tausaga na tea nei na tuumalo ai lē sa avea ma faipule o le itumalo le afioga Tapunuu Niko Lee Hang, o le mafuaaga lea ua avanoa ai le nofoa o le Vaimauga 3 i le Palemene, ma mafua ai foi ona poloaiina e le Fofoga Fetalai le faia o se palota laititi e toe saili ai se sui usufono o lea itumalo i le Fono Aoao Faitulafono.

E lei oo i le taimi e faasilasila ai le faauluina o ni suafa o sui faatutu o lea palota laititi.