E 25 moliaga o le faia o ni gaioiga ma tala faasoesa i luga o auala o fesootaiga, faapea le faia o ni tala ogaoga ma taufaaleaga, ua amata suesue nei e le faamasinoga faaitumalo e faasaga i le tamaitai Samoa e alala i Amerika, o ia lea o Feagia’i poo Salote Sera Tautai, e iloa foi i le suafa Perkin Feagia’i Tauvao o Faala Palauli ma le Iunaite Setete o Amerika.
O ia moliaga uma i tala ma gaioiga na faia e lē ua molia i luga o le api o foliga poo le facebook na faatutu pe agai i le tamaitai Palemia, ma nisi o sui faipule o le vaega faaupufai o le Faatuatua i le Atua Samoa ua Tasi.
E ono molimau a leoleo o loo finauina e se tamaitai loia tutoatasi poo se private prosecutor, ae o le alii loia susuga Faimalomatumua Mathew Lemisio o loo finauina le tetee a Perkin Feagia’i Tauvao ma isi ona suafa e pei ona faailoa muamua atu.
E tolu aso o loo faagasolo ai le suesueina o molimau, ae o moliaga e 25 o loo tuuaia ai lē ua molia, a faamaonia e mafai ona faasala ai i le falepuipui mo le umi e lima tausaga. O le faasalaga o isi moliaga o le faia o tala tau faaleaga ua faamanualia ai lagona o ni tagata, e 3 masina i le falepuipui poo faasalaga tupe.
O le tamaitai faamasino le afioga Alalatoa Rosella Papalii o loo tauaveina suesuega o lea faamasinoga.
