Ua faaiuiu le tausaga ma ua amata foi ona faagasolo le faatinoga o suega ulufale a nisi o kolisi maualuluga mo fanau aoga ua mae’a a latou aoga tulagalua (primary schools) i le tausaga nei.
I lipoti a le Samoa Global News na faailoa ai e oo atu i le to’a 933 le aofai o fanau na auai i le suega ulufale a le Kolisi o Samoa i le faaiuga o le vaiaso na tea nei.
E pei ona silafia o le Kolisi o Samoa o se tasi o aoga e toatele i latou e iai le naunautaiga ina ia ausia lenei aoga faatasi ai foi ma isi aoga a le Malo e faatino foi a latou suega ulufale e pei o le Kolisi o Avele. O nisi aoga a Ekalesia e pei o le Kolisi o Levaula e faatino foi a latou suega ulufale.
I lea lipoti na faailoa ai e le Pule Sili, Karene Faasisila, e tutusa lelei le aofaiga o i latou na sue i lenei tausaga ma le tausaga talu ai 2021, o lona uiga o loo faaopoopo pea le toatele o fanau aoga laiti o loo moemiti i le fia ulufale i le Kolisi o Samoa.
O le masani ai i soo se suega ulufale e lua mataupu e sue ai fanau o le Igilisi ma le Matematika. O se taimi o i luma ona faailoa lea e le kolisi i latou ua faamanuiaina e ulufale i le Kolisi mo le Vasega 9 i le tausaga 2023.
