O le aso 25 o Novema i tausaga taitasi e amata ai polokalame faalauiloa i Samoa ma le lalolagi e autu i le tetee atu i le sauaina o tina ma tamaitai ma fanau teine laiti.

O lea ua faaauau ai le lagolago a le Faalapotopotoga o le Toomaga mo ē Puapuagatia o se tasi o auaunaga tuma’oti i lo tatou atunuu o loo feagai ma taumafaiga e taofia ma tafiesea ai sauaga i totonu o aiga.

Ua faailoa e le Toomaga i sana pepa o faasalalauga faalauaitele, o se tasi o ana taumafaiga ua lagolago atu ai tupulaga tama talavou ma le au tino i matutua i le itupa o alii e aofia ai tamā o fanau ua sauaina, e galulue faatasi e saili fofo e taofia ai sauaga faasaga i tina ma tamaitai ma alo teine laiti o le atunuu.

O se tasi lea o tulaga ua ausia talu ona faatino ana polokalame, ma ua toatele le itupa o tama tane ua lagona le feau o loo latou molimoli iai.

O se tasi o fesoasoani a le faalapotopotoga ua faatupe ai taumafaiga i totonu o nuu ma afioaga e atiina a’e ai le manuia o aiga, ma o se polokalame o loo faatupe e le Malo i le sini autu, ia taofia sauaga i le tino, o le agaga ma le mafaufau.