Ua amata toe foi aiga Wairoa i o latou fale, i le mae’a toe suia ai o lanu o stickers mai le mumu agai i le lanu samasama, ma le lanu samasama i le lanu paepae.
O lea ua faamautinoa mai e le pulenuu ia Craig Little i tala a le leitio a Niu Sila o lea ua i lalo mai o le toe lima fale o Wairoa o loo pipii ai le sticker lanu mumu poo fale nei ua matuai faasā ona toe ulufale iai se isi.
O le tusa foi ma le 117 fale sa sticker lanu mumu o lea ua suia i le lanu samasama ma ua mafai ai ona o iai, e faapea foi le tele o fale sa lanu samasama muamua ae o lea ua lanu paepae ma o lona uiga ua mafai ona toe nofoia.
O le aai lenei o Hawke’s Bay na matuai iloga ona tigaina i le afā o Gabrielle ma na ta’ua e le pulenuu e le faapea ua toe aulelei ma atoa meaafale o le tele o fale o aiga nei ua toe foi i aiga, ma e umi se taimi e toe tau faatulai mai ai le komiuniti.
