Ua amata nei ona lesitala tagata fou faato’ā talosaga i galuega faavaitaimi i Niu Sila ma Ausetalia, i ofisa o Fono Faavae a itumalo faapalota e 51.
O lea suiga o le a lē toe aga’i ai tagata faato’ā fia lesitala mo ia avanoa faigaluega i le ofisa o galuega faavaitaimi lea o loo i le fogafale 2 o le NPF.
Ua faailoa e le Matāgaluega o Alamanuia, Pisinisi, ma Leipa ua na o tagata ua lesitala e mafai ona iloiloa a latou talosaga ma e iai foi iloiloga e faamautinoa ai le tulaga agavaa i le avanoa faigaluega o se sui lesitala e mafua i mataupu e aafia ai le taufaasese poo le feavea’i o faamatalaga sese.
Ua fautauina ai le atunuu e lea matāgaluega ua na o ofisa o Fono Faavae a itumalo e lesitala ai, e aunoa ma se totogi o le lesitala.
Mo i latou sa resitala muamua mo ia galuega ua faailoa i le faasilasilaga a le matāgaluega i lana upega tafa’ilagi e ao ona fesoota’i le ofisa o galuega faavaitaimi mo le siakiina ma le faamaonia auā e lē toe moomia ona faafou lea lesitala.
E pei ona silafia o le ta’iala fou ua mae’a faataoto e le malo mo ia avanoa faigaluega i Niu Sila ma Ausetalia ua ave ai le filifilia o tagata mo ia galuega i ofisa o Fono Faavae ma o tagata foi o ia itumalo e aga’i sa’o i ofisa o Fono Faavae a o latou itumalo e lesitala ai ma maua ai le tali o lana talosaga i se avanoa faigaluega.
