O le Aso Tofi o le vaiaso nei o le a amata ai le taamilosaga lakapi ta’ito’afitu a A’oga i totonu o le motu i Upolu lea o le a faia i le malae i Alafua.
Ua mae’a le taamilosaga a aoga o le motu tele i Salafai ma ua saofagā ai kolisi e pei o Palauli, kolisi o Palauli i Sisifo, Church College Vaiola, Savaii Sisifo, Amoa College ma le kolisi o le Itu o Tane i le sailiga siamupini.
E pei ona silafia o lenei taamilosaga o loo faaautū i le faamoemoe ina ia una’i le tupulaga e faalauiloa le ola soifua mālōlōina e tauala atu i le lakapi ae lē gata i lea o auala e faaitiitia ai le tulai mai o faama’i le pipisi poo non communicable diseases.
O lenei taamilosaga a le National Schools Invitational Sevens Series 2022 o loo lagolagoina e le Matagaluega o Tina ma Tamaitai, Afioaga ma Agafesoota’i, Matagaluega o A’oga Taaloga ma Aganuu, Vodafone Samoa, PacificEzy ma le SSAB.
E tolu taamilosaga o lenei faamoemoe, Vaega muamua o a’oga i Savaii, Vaega lona lua o le a faagasolo i lenei vaiaso o aoga i Upolu ma le vaega mulimuli o le sailiga siamupini i le masina o Setema.
