Ua tuvae i laufanua o Tonga le faigamalaga a le minisita o le va i fafo a Niu Sila, Winston Peters faapea le minisita o le soifua maloloina ma tagata Pasefika, Dr Shane Reti, i le vaega muamua o le la malaga i le Pasefika poo le Pacific mission e afea ai Tonga, Le Atu Kuki ma Samoa.
O le lua ai lea o malaga a Peters i lea itulagi, o le isi malaga sa iai ia Tesema i le atunuu o Fiti i le tausaga talu ai.
Ina ua taunuu atu le malaga sa faatali mai ma faafeiloaia e sui o le malo o Tonga ma le komesina o Niu Sila i Tonga, Matthew Howell.
O le a feiloai atu Peters ma Reti i lē o loo avea ma Sui Palemia o lea atunuu i le taimi nei, Samiuela Vaipulu ma faatalanoa ai mataupu tau le soifua maloloina ma asia se tasi o faletalavai fou i Nukualofa.
Ua lipotia i le leitio faavaomalo a Niu Sila, o le a feiloai foi Dr Reti ma sui o le soifua maloloina ma faatalanoa ai se sao o Niu Sila i le ausia o nisi o faamoemoega ua leva ona faatulaga mai o atumotu i tulaga tau le soifua maloloina.
O a taeao o le a malaga ai i Rarotonga e feiloai ma le Palemia o Mark Brown ma faaiu ai le malaga i Samoa lea o le a feiloai atu ai foi i le Palemia o lo tatou atunuu, afioga Fiame Naomi Mataafa.
