Ua faailoa e le faalapotopotoga o le Toomaga mo ē Puapuagatia le amata o le tausaga fou 2023 i ni vaaiga lelei i taumafaiga o loo latou faatino i polokalame e tetee ai sauaga i totonu o aiga, lea o loo faatupe i se fesoasoani a le Malo.
Ua talatala mai e le Toomaga i se latou pepa o faamatalaga faalauaitele le molimauina o ni suiga ina ua asia nisi o nuu ma faalapotopotoga e aofia ai nuu o Vailuutai, Fusi Safata, Saleapaga ma Lalomauga.
O le ono masina ua mavae mai le masina o Iulai e oo mai ia Tesema o le tausaga na tea nei, ua iai suiga lelei i totonu o ia nuu ma ua ave le faamuamua i le tausia o le saogalemu o tagata mai le toe aafia i ni amio e fesootai i sauaga o le tino ma le mafaufau.
O le tulaga foi lea ua faamauina mai galuega a tupulaga o nisi o ia afioaga o loo lotolotoi i le polokalame ma o se ata lelei lea i taumafaiga e taofia ma teee atu i sauaga e aafia ai le ola saogalemu o tina ma fanau teine laiti.
O aso fiafia o le Kerisimasi ua mavae atu nei ua faailoa e le Toomaga, o se lipoti mai nuu e fa sa latou asia, o le filemu ma sa leai ni gaioiga faatupu vevesi e mafua i le tagofia o le ava malosi.
O faamaumauga a le faalapotopotoga mai le masina amata o le tausaga na tea nei e oo mai ia Tesema o le 2022 o le 45 pasene o mataupu sa logoina atu sa aafia ai le avamalosi.
O lea tulaga na mafua ina ua faailoa se tusi ta’iala e tomatauina ai taumafaiga a ia nuu ma afioaga e avea ma faasinoala ia latou polokalame e faasagatau atu ai i le tafiesea o sauaga i totonu o aiga.
Ua faailoa foi e le Toomaga le tulaga lelei i tupe maua mai nisi o vaega o le polokalame o loo taumafai ai e fesoasoani i tupulaga talavou a ekalesia o loo i totonu o le polokalame e taofia ai le tutupu mai o sauaga ma aafia ai le saogalemu ma le nonofo filemu o aiga.
E ‘afa miliona tala le fesoasoani a le Malo o loo faatino ai e lea faalapotopotoga polokalame e taofia ai sauaga i totonu o aiga.
