O le aso 6 o Iulai o le tausaga nei e amata faamamalu ai le malaga o tagatanuu o Samoa i le atunuu o Isaraelu e aunoa ma le toe manaomia o se visa e ulufale ai i lea Malo i Sasa’e Tutotonu.

O le mae’a ona tauaao o tusi tofiga o le amepasa fou o lea Malo mo Samoa i le afioga i le sui o le Fono o Sui Tofia le afioga Le Mamea Ropati na faailoa ai i le pepa o faamatalaga le mautu o lea maliega na sainia i le tausaga e 2019, lea e le gata ua le toe faia ni visa, ae tolu masina poo le 90 aso e mafai ai ona nofo i Isaraelu se tagatanuu Samoa e fia malaga i lea atunuu.

Ua faailoa e le amepasa fou o Isaraelu mo Samoa o Ran Yaakoby, talu ona amata sootaga faavaomalo o atunuu e lua i le tausaga e 1977, ua tusa ai nei ma le 47 tausaga, o loo tumau pea sootaga lelei o Isaraelu ma Samoa.

O le polokalame a lea Malo e ta’ua o le MASHAV o loo maua ai e lo tatou atunuu fesoasoani i le itu i tomai tau aoaoga, o le atina’e o faatoaga ma le soifua maloloina.

O loo umia e le amepasa o Ran Yaakoby faailoga maualuluga mai le Iunivesite Eperu i le aai o Ierusalema ma le Iunivesite i le Telaviv, ma e tele nisi o tofiga tau upufai o lona Malo sa ia tauaveina a o lei filifilia e avea ma sui aloaia o lona Malo i lo tatou atunuu.

E faamautu o ia i le ofisa tutotonu o le Malo Isaraelu i Ueligitone i Niu Sila.