O le uluai mataaga mo tafaoga a aiga ma fanau poo le amusement park i Samoa ma le Pasefika atoa lea ua faagasolo a latou fuafuaga mo le tapunia tumau. 

I lipoti a le Samoa Observer na ta’ua ai e le pule o le Fiafia Park ia Tupai Bruno Loyale ua tatau ona faamaamulu mai lana atinae lenei na inivesi ai lana 4 miliona. 

Na ia ta’ua foi e toe lua vaiaso o le a tatala ai lea paka mo le atunuu ona tapunia tumau loa lea. E ui i le faigata o lenei faaiuga, ae na ta’ua e Tupa’i ua oo i le taimi e tatau ai ona agai i luma lana pisinisi i fafo atu o Samoa. 

Na faasoa foi Tupai i nisi o faafituali na feagai ai ma le Fiafia Park e pei o le pepesi ai o le misela i le atunuu e le’i iai se manatu o le a aafia ai fanau a le atunuu ae le gata i lea o le malosi o le aafiaga o le Koviti ma tele ina le mafai ai ona faagaioi pisinisi. 

O nisi ia o mafuaaga ua a’e ai se manatu i le pulega ua tatau ai ona tapunia loa le paka i Samoa ae agai e saili manuia i isi atunuu. E pei ona silafia na tapunia tuaoi o Samoa mo le 2 tausaga ona o aafiaga o le Koviti ma e tele pisinisi eseese na matuai telē ai lo latou aafiaga. 

Na ta’ua foi e Tupai na matuai manaia le amataga o le pisinisi, manuia le tele o vaega peitai ua oo i le taimi e faamaamulu ma tapunia ai lea vaega o le auaunaga.