O le Aso Lulu o lenei vaiaso ua faagasolo ai le vaega faaiu o taualumaga o le faamasinoga o Lema’i Faioso Sione ma Malele Atofu Paulo.
Ua ta’ua lea laasaga ua oo iai suesuega o molimau o le summing up lea ua aofia ai le folasaga a le faamasino o loo seei i le tauaveina o le mataupu, o le a ia faamanino i le laulau o faatonu ala o le Tulafono ma le faatinoga o le latou pitolaau i le iloiloina ma le totoa o molimau a itu e lua.
E faapea foi ma folasaga ma finauga a loia a itu auai o le a tāaofai uma ai molimau mai le itu a leoleo faapea molimau a i laua ua molia.
A mae’a lea vaega tāua o suesuega a le faamasinoga e pei ona feagai ma se laulau o faatonu ona see atu lea o faatonu, e iloilo mau uma ua folasia ma faia se latou faaiuga.
Ua iai le faamoemoe e pei ona faaalia e se loia o loo auai i le finauina o le tetee a Lema’i ma Malele i le moliaga o le taupulepule e tagatavaleina lē sa avea ma Palemia, e ono maua se faaiuga i le faamaonia ma le lē faamaonia o moliaga i le agai atu i le faaiuga o lenei vaiaso.
