E toatolu loia a le kamupani o Chan Mow poo Amau, ae toalua loia a le kamupani o le Progressive Insurance, ua amata nei ona faia a latou finauga faaletulafono ma tuuina atu mau e lagolago ai a latou folasaga i luma o le faamasinoga sili i Mulinuu, ona o le tagi a le kamupani a Amau ua le uma ona totogi atu e lea pisinisi inisiua le $9 miliona o le taui tau inisiua o le fale sa iai le oloa siiatoa a Amau sa faatamaia i le malaia poo le afi i le tausaga e 2016.
O le paleni o loo totoe e silia i le $4 miliona peitai ua faailoa e le kamupani ua ia ave le mataupu i le tulafono, o loo silafia e le Progressive Insurance ua mae’a ona faapepa le latou maliega i le togitogiina o le vaega tupe o loo totoe, ae ua latou faaulu i le faamasinoga se tautinoga o le kamupani ua gau ma latou faailoa ai foi le filifilia o se tagata e faamautu i Niu Sila e gafa ma le faagaioia o tapenaga faaletulafono o le gau o le pisinisi inisiua.
I le folasaga amata a loia a le itu tagi i luma o le Faamasino Sili i le Aso Gafua na faailoa ai o lea tagata ua avea ma liquidator, e leai sona laisene i totonu o Niu Sila e agavaa ai ona ia faatino lea tapenaga.
O le vaega muamua lea o le finauga a le itu tagi ua finau ai e le agavaa lea tagata na filifilia e le Pule o le kamupani inisiua ma o loo muamua tagofia e le faamasinoga lea finauga, a o lei oo atu suesuega ma tuuina atu molimau o le isi laasaga o le mataupu, o le faauma atu lea o le vaegatupe e lei totogiina o le taui o le inisiua o le fale ma meatotino, o le oloa siiatoa a le kamupani a Amau na liu lefulefu i le malaia.
O le kamupani a Amau o se tasi o paaga faapisinisi a le Progressive Insurance o loo avea ma Faatonu poo Director o le kamupani inisiua. E tolu aso o loo faagasolo ai lenei mataupu.
