Ua 26 tausaga le matua o le vaa o le MV Fotu o Samoa II ma ua tele ia tausaga o tautua i malaga i le va o Upolu ma Savaii aemaise o malaga togipau sa fealua’i ai i ogasami o le teritori Amerika Samoa.
O loo lisi atu nei lea vaa o le Malo o Samoa i le kamupani vaa o le Silva Group ma fealua’i ai nei i le va o motu o Tutuila ma Manu’a mo le umi e tasi le tausaga.
A o lisi atu ai lea vaa o le faalapotopotoga o vaa o Samoa i lea kamupani i Amerika Samoa, ua faailoa i auala o fesoota’iga a le Malo o Samoa le amata fausia ai nei o se isi vaa fou e sui ai le Fotu o Samoa II i le tau e tusa ma le 5 miliona tala Amerika.
O le atunuu o Meleisia o loo fausia ai lea vaa fou e pei ona fuafua e 16 masina le umi e faatino ai lea galuega.
Ua faailoa e le pule o le faalapotopotoga o vaa a Samoa i lea faasalalauga o le vaa fou o le a ave ai na o uta, ae leai ni pasese.
O le a faapitoa foi i le ave ai o oloa tau suauu ma penisini.
