E 32 miliona valu selau afe tala le tau o le galuega tele ua amatalia nei, o le fausia o le Kolisi mo a’oa’oga i tomai faaleoleo poo le Police Academy, o le a faatupe i se foai poo se grant mai le Malo o Saina.
O le afioga i le tamaitai Palemia, afioga Fiame Naomi Mataafa, ma le sui o le Malo o Saina i Samoa le alii Amepasa o Chao Xiaoliang, sa o la suaina le eleele e faailoga ai le amatalia o lea galuega tele.
O se vaega o le fanua o le Malo sa iai le falepuipui tuai i Tafaigata ua fausia ai le kolisi, ma le faamoemoe e tatau ona mae’a i totonu o le 18 masina.
Se vaega o le saunoaga a le Minisita o le Matagaluega o Leoleo, Falepuipui ma le Ola Toe Fuataina, afioga Faualo Harry Jeffrey Schuster, i le sauniga o le suaina o le eleele e faailoga ai le amatalia o galuega o le kolisi mo le a’oa’oina o tomai faaleoleo.
O se uluai nofoaga ua faatuina i lo tatou atunuu e faapitoa i le a’oa’oina o alii ma tamaitai e fia galulue o ni Malu o le Malo. O se tasi o taualumaga a le Palemene sa talanoaina ai fuafuaga tau tupe a le Malo na faailoa ai e le Minisita, o nisi o tagata popoto faapitoa i le a’oa’oina o tomai faaleoleo o le a galulue i le kolisi.
O le tausaga e 2019 na faamautu ai le maliega mo le fausia o le kolisi ma le faamoemoe e amatalia i le faaiuga o le masina o Aperila o le tausaga e 2020.
Peitai o le pesia ai o le lalolagi i le faamai Koviti-19 na amata mai Saina, na mafua ai ona to’a, ae o lea ua toe tatala uma noataga o puipuiga o le faamai ma ua mafai ai ona amata le galuega o loo feagai ma se konekarate faufale mai le atunuu o Saina.
