Ua faailoa e le faletupe tutotonu o Samoa le amata faatalatalanoa e faletupe faapisinisi poo Commercial banks, ma auaunaga tau pisinisi o loo tala ma lafo ai tupe faamomoli i totonu o le atunuu, le auivi o se tulafono ua fuafua e suia ai le tulafono o puipuiga o Samoa mai tupe eleelea poo le Samoa Money Laundering Act o le tausaga e 2007.
O le faamoemoe lenei na faamaonia lona faatinoina i se ioega a le Kapeneta i le tausaga na te’a nei 2024 i le faamoemoe e siitia le tulaga o puipuiga o le atunuu mai le sao mai o gaioiga faapisinisi e aafia ai tupe eleelea.
Ua faailoa e le faletupe tutotonu le faamaonia e le faalapotopotoga o tupe faavaomalo le International Monetary Fund poo le IMF o lea tulafono taufaaofi a Samoa lea a mae’a ona faatalatalanoa auaunaga tau tupe uma e aafia ai, ona tāpā lea o ni finagalo o le lautele o le atunuu a o le’i faamautū ona fausaga mulimuli mo le tuuina atu i le Palemene i se taimi talafeagai.
