O le vaveao o lenei Aso Gafua i luma o le ofisa tutotonu o le Toomaga mo ē Puapuagatia i le nofoaga autu o le matagaluega o leoleo falepuipui ma le ola toe fuataina, na amata ai ona faasavali le Sulu o le Filemu poo le Torch of Peace, ina ua mae’a se sauniga puupuu na tutu ai le sulu.
Na faaalia e le Peresetene o le Toomaga, o le 18 tausaga talu ona faatuina le faalapotopotoga e tele luitau sa feagai ai a o tau faalautele i tagata mo lo latou silafia le tāua o le taofia o sauaga, ma ua iai nisi ua faasaoina mai ai o latou ola.
O le itu i Sasae o le taulaga ua faasavali muamua iai le sulu o le filemu i le momoliina o le feau ia taofia soo se sauaga faasaga i tina ma tamaitai ma fanau.
A mae’a ona faasolo i Upolu le sulu ona agai lea i le motu o Savaii ma faamae’a ai.
