O le Ekalesia Asofitu o le Toe Afio Mai i Samoa ua amatamea i le lagolago i le polokalame a le Malo o le faia o faaaliga o uluai seleselega ma talomua, e pei ona sa faatino lea faaaliga i le Aso Lua o lenei vaiaso i le lotoa o le nofoaga tutotonu o lea ekalesia i Lalovaea.
O le polokalame amata foi lea o le fonotele a le ekalesia asofitu o le toe afio mai ua faagasolo i le vaiaso nei, ma faamanatu ai foi le atoaga o le 132 tausaga talu ona tulaueleele i laufanua o Samoa le ekalesia.
Se vaega o le saunoaga a le afioga i le Minisita o Faatoaga ma Faigafaiva susuga Laauli Leuatea Polataivao Fosi Schmidt na tatala ai le faaaliga o fua o atina’e tau faatoaga a le Ekalesia Asofitu o le toe afio mai, ua usuia ai foi ma lana fonotele.
O le faatoa toe tauaofia lea o se fono tuufaatasi a le ekalesaia i le tuanai o le lua tausaga e lei toe tauaofia ona o le faamai Koviti-19.
