Ua fuafua leoleo e tatau ona aveesea mai tino maliliu mai le Loafers Lodge i se taimi o le asō.
Saunoa le sui komesina o leoleo i Ueligitone, Dion Bennett i se faatalanoaga ma tusitala, o le aoauli nei lea e fuafua e faatino ai lea galuega ma ua fuafua o le a aveese muamua mai tino maliliu e lua i le asō, le isi lua a taeao seia faauma le galuega ma o le a muai faia foi le karakia a o lei faatinoina lea galuega.
Fai mai Bennett o le fogafaletolu o le Lodge lea o loo matele ina faaleagaina ma o loo faia pea suesuega.
E toatasi le tagata o loo iai pea i le falemai mai lenei faalavelave ma le 92 ua maua uma ae itiiti ifo ma le 20 o loo tau sailia pea.
Fai mai leoleo o loo iai tagata o loo taulai iai le suesuega masalomia na faatupuina le afi atoa ai ma se lipoti i se nofoa na mu i le Lodge e tusa ma le lua itula ae lei tulai mai le faalavelave.
