I le toatele o tagata o atunuu eseese o le lalolagi ua faaee iai faailoga taualoa a le Tupu o Peretania mo lenei tausaga fou, o le tamaitai sa avea ma Loia Sili a le Malo o Samoa i ni tausagaua mavae, le afioga Taulapapa Brenda Heather Latu, o se tasi o le 67 o i latou ua faaee iai le faailoga taualoa o le MBE poo le Member of the British Empire, a le afioga i le Tupu o Salesa III.
Ua faailoa i se pepa o faamatalaga mai le Ofisa o le Komesina maualuga o le Malo o Peretania i Samoa, o lea faailoga taualoa ua amanaia ai le tautua a Taulapapa Brenda mo tagatanuu o Peretania i Samoa i le avea ai o ia ma Konesula o lea Malo poo le Honorary Consul.
O le tuaa tamā o le tina o Taulapapa le alii fomai le afioga Taulapapa Dr Anesi na faaee foi iai le faailoga taualoa o le MBE a le Aiga Tupu o Peretania i taimi o galue o ia i le auaunaga a le matagaluega o le soifua maloloina i lo tatou atunuu i le tausaga e 1910 i le 1991.
O le tasi tamalii o le atunuu na faaee foi iai lea faailoga o le susuga Joseph Edmund Stehlin.
O le faaaloalo a le Malo o Peretania na amanaia ai foi le afioga Tupua Tamasese Meaole ma le susuga Malietoa Tanumafili II sa avea ma Ao Soofaatasi, i le faaee iai o le faailoga taualoa o le CBE poo le Commander of the British Empire.
Ua toalima i le afioga Taulapapa Brenda Heather Latu tagatanuu o Samoa ua faaee iai ni faailoga taualoa a le Aiga Tupu o le malo tele o Peretania.
