O le faailogaina talu ai nei e Samoa o le aso faavaomalo e faatāua ai aiātatau o tagata soifua e pei ona taulamua ai le ofisa o le Komesina o Sulufa’iga, ua faailoa ai le maua e le tamaitai pule o le ofisa o le Nuanua o le Alofa o le faailoga taualoa mo aiātatau o tagata.
O le tamaitai o Mata’afā Faasino Utumapu, o le pule lea o le ofisa o le Nuanua o le Alofa poo le NOLA ma o lana tautua i le una’ia o aiātatau o tagata e iai mana’oga tumau i Samoa, o se amana’ia tāua o lana galuega e pei ona ia maua ai lea faailoga taualoa.
O lea faalapotopotoga o loo faama’ite i le faalauiloaina o avanoa tutusa e maua ei latou e iai mana’oga tumau ina ia laugatasia ai ma tagata e leai ni mana’oga tumau.
Ua faailoa e Mata’afā Faasino Utumapu i le faasalalauga a le NOA i lana upega tafa’ilagi, o le faailoga ua ia maua, o le faafetai lea i le sao o i latou uma o loo latou galulue i le ofisa o lea faalapotopotoga tuma’oti.
