Na manino i le saunoaga a le tamaitai Palemia i le aso muamua o polokalame o le faafeiloai ma le faamalo i le tatou aulakapi liki le Toa Samoa, le avea o lea faamoemoe sa tapena e le Malo e amanaia ai foi ma momoli le faafetai ma le faamalo, i alo ma fanau a le atunuu i le aulakapi taitoafitu a le Manu Samoa, o le ausiisii uamea mamafa ma le tatou aulakapi tele a le Manu Samoa.
O le sauniga i luma maota o le Malo i le eleele fou na matua faatumulia i le toatele na auai, ma o se sauniga foi na avanoa ai le toatele ona feiloai atu i ia tamafanau taaalo a le atunuu aemaise o sui o le tatou aulakapi liki o le Toa Samoa o le autu lea o tapenaga uma, aua faatoa maua lea o le avanoa e malaga mai i le atunuu sei momoli iai le faafetai ona o lo latou alofaiva i le Ipu o le lalolagi na faia i le masina o Oketopa ma Novema.
O se vaega o le saunoaga a le taitai o le Malo le afioga i le tamaitai Palemia, afioga Fiame Naomi Mataafa, i le sauniga na faafeiloai aloaia ai le Toa Samoa, ma isi autaaalo a le atunuu sa faamanuiaina a latou taumafaiga i lenei tausaga.
O le faaiuga o lenei vaiaso ua faaauau ai polokalame mo le Toa Samoa lea o le a malaga i Savaii i le Aso Toonai ma feiloai ai ma lo tatou atunuu i Puleono i Salafai.
