O le Aso Lulu o lenei vaiaso ua alu ai le solo filemu a nisi o lo tatou atunuu ua momoli ai se sainigalima poo se petition i le Malo, ua finauina ai e lagolago atu i le latou mau, o le taofia loa o le taua a Isaraelu o loo tu’i pomu ai e ona vaaleletau le nofoaga o Gaza o se eleele o tagata Palesitina.
O ola ma soifua ua lata i le 20 afe ua fano i le taua, o se tasi o autu o le savali filemu mo le taofia o le taua.
Faaalia e se sui o le komiti o loo tapenaina le savali filemu ua latou faia se sainigalima e momoli i le Malo ma tapena le faamoemoe, ona o Samoa o se atunuu Kerisiano sa nofo pologa foi i pulega a isi malo ma sa tele foi tausaga o finau mo sona malo tutoatasi, e pei foi o tagata Palesitina.
O le leai o se palota a Samoa i le iugafono a Malo Aufaatasi e taofi le taua, ae se’i faatino galuega laveai mo tagata Palesitina ua aafia ola ma soifua, o se tasi lea o faanoanoaga o i latou o loo tapenaina le savali.
O se sui o le komiti o le Samoans for Ceasefire, Renate Rivers i se faatalanoaga i le Aso Lua a o lumanai le savali filemu i le ogatotonu o lenei vaiaso.
