Ua iai nei se isi fesoasoani mo tagata e aumau i Sini ina ua lipotia le mafai ona vaai o se foma’i mo nisi gasegase e lē tigaina e faaaogā ai auaunaga i luga o upega tafa’ilagi e aunoa ma se totogi.

Fai mai lipoti o lea auaunaga ua faaaofia ai ma tagata i le itu i Sisifo o Sini, Saute i Sisifo, Nepean Blue Mountains, Central Coast ma le Illawara Shoalhaven e pei ona folafola e le Minisita o le Soifua Mālōlōina a Niu Sa Uelese, Ryan Park.

I lea auaunaga fou, o i latou e ta’i 16 tausaga ma sili atu e aumau i Sini e lē toe tau faatali se’i aga’i i le Emergency Department mo togafitiga i ni gasegase e lē tigaina tele e pei o le tale, flu, fiva, faaletonu o le mānava, faasuati, manava tatā poo nisi aafiaga laiti poo mageso o le tino.

Fai mai le minisita o lenei faiga o le a ‘alofia ai le tau faatali mo se foma’i faaleaiga pe i le falema’i foi ae mafai ona valaau sa’o i le Health Direct i le 1800 022 222 mai le 8 i le taeao i le 10 i le po i soo se aso o le vaiaso e talanoa ai i se tausi soifua ua lesitalaina e fesoasoani i le gasegase.

Afai e mana’omia o le a maua foi le avanoa e fesoota’i ai ma foma’i i luga lava o lea auaunaga ma e lē totogia.

O se vaega o fuafuaga a le Malo e faamāmā mai ai le avega i nofoaga e pei o le emergency department.

Puna o Faamatalaga: https://7news.com.au/news/sydney-residents-can-now-access-free-online-doctor-consultations-from-home-c-17917939