Ua faasilasila aloa’ia ai nei e le afioga i le Ao o le Malo, le afioga Tuimalealiifano Vaaletoa Sualauvi II le amatalia o le Vaiaso o Anapogi i le atunuu atoa, lea ua faasilasila ai ma le aloa’ia o le tapu poo le sā ona toe faia o nisi o galuega i le Aso Sa, se’i vagana galuega masani mo auaunaga e manaomia e tagata.
O lea foi ua aloa’ia ai i le faasilasilaga mai le Ao o le Malo poo le proclamation le amata o anapogi a le Malo i Aso Lulu o vaiaso taitasi mo le tausaga atoa, e faatino e ,Matagaluega ma Faalapotopotoga a le Malo.
Le faasilasilaga aloaia mai le Ao Mamalu o le Malo sa fofogaina e le Ofisa sili o le Matagaluega a le Palemia ma le Kapeneta le tōfā Agafili Tomaimanō Shem Leo.
O le saunigā lotu i le maota tatalo i le Mauga o Vaea e tatala ai le vaiaso atoa lenei o talosaga ma anapogi e pei ona masani ai i amataga o tausaga fou na faasilasilasila ai ia tulaga, e pei ona sa mua’i faailoa muamua e le ta’ita’i o le Malo, le afioga i le Palemia i le masina faaiu o le tausaga ua mavae atu nei.
