O le a vave agavaa fanauiti i le 20 itula maua fua e mafai ai ona ave i aoga amata.
O se tasi o fesoasoani a le malo na sau i lana paketi ananafi, lea o le a ia faatupeina ai le $1.2 piliona mo le fā tausaga.
I le taimi nei o lea e na o fanau 3 tausaga agai i le 5 tausaga e agavaa i le 20 itula maua fua nei e aooga ai i aoga amata.
Mai le malo o le a faasao mai ai le isi $133 i le vaiaso mo matua, ma e talitonu le Palemia, Chris Hipkins o se fesoasoani tele lea i mātua a o iai i le taugata o le soifuaga.
I aoga amata lava, o lea foi ua tuu ese le $322 miliona mo auaunaga a aoga amata ia siitia ai totogi o faiaoga ma e amata tatala mai i le masina o Novema o le tausaga nei.
O le vave agavaa ai o fanau mai le lua tausaga mo itula 20 e aooga ai i aoga amata, o le a amata aloaia mai ia Mati o le tausaga fou.
