O le alii taalo lelei a Ausetalia o Kalyn Ponga ua agai atu nei mo Kanata e saili togafiti ai mo manuaga mai le taaloga aemaise lava manuaga i le ulu, concussion lea o le a siaki ai e se fomai faapitoa, specialist.

O Ponga o le isi kapeteni a le Newcastle Knights ma o loo iai i se tulaga faigata lona lumanai i le taaloga ona o manuaga ma e le o le taimi muamua foi lea ua aafia ai lona ulu.

Fai mai a o iai i Kanata o le a faia ai ni tests e faaaoga ai se masini mo togafitiga e lei oo muamua mai i Ausetalia.

Sei vagana ua maua mai iuga o ia suesuega ona faatoa fai lea o le faaiuga a le kalapu i le lumanai o Ponga i le taaloga aemaise o lana kalapu.

O le mataupu lea ua talafeauga tonu ma le iuga a le NRL na tuuina faalauaitele mai i se taimi e lei mamao atu e faamalosia ai le faamalolo o se tama taalo ua aafia i le concussion mo le 11 aso.