Ua faamautinoa mai e le Pharmac o loo aga’i e faia suiga tetele i auala o loo faafoe ai ana auaunaga ona o le faai’uga o su’esu’ega tuto’atasi ua ta’uleagaina ai ia. 

E 33 suiga ua aumai faafautuaga mai le iloiloga na sau i tua i le masina o Iuni, ma i lea lipoti ua tatau i le Pharmac ona faamausalī faiga tutusa mo tagata Niu Sila uma, aemaise lava tagata Pasefika, Maori ma i latou e lē atoatoa le malosi o le tino. 

O se lipoti o loo ta’ua ai le umi tele o faiga faailogalanu i totonu o le soifua mālōlōina, ma ua agai ai le Pharmac e saili auala e aveesea ai le va lea e i le va ma komiuniti Maori faapea Pasefika. 

Ua fai mai ai foi o le a saga faia auala e manino ai ma lagona leo o tagata mai talanoaga talafeagai. 

E ese mai i lea, o tagata e lē atoatoa le malosi o i latou foi nei e lē o maua avanoa tutusa ona o le lē lelei o le system. 

O lea ua faatalanoa e le pulega suiga o loo aumai faafautuaga e le lipoti.