Ua upuia ma faaseā tagata i le faigamalo a Aferika i Saute ona o la latou tali atu i le eliina faasolitulafono o le eleele, illegal mining lea ua motusia ai ma le sapalai o taumafa ma vaiinu sa fuafua mo miners o loo i lalo o le palapala, underground, aemaise i le mae’a aveeseina mai o tinomaliliu e 78 mai lea nofoaga le Stilfontein Mine, i le vaiaso nei.
O loo galulue pea le aulavea’i mo le sa’ilia o nisi o mafai ona faasaoina mai i le mae’a foi ona tuu ane o se poloa’iga a le faamasinoga e faatino ai le lavea’iina o ia tagata.
O se sooupu a leoleo ua faailoa mai a itiiti mai pe 166 tagata ua lavea’iina mai le mine lea ae silia ma le 100 e talitonuina ua maliliu ona o le leai o se taumafa poo se vai a o iai i lea nofoaga.
O se faamatalaga mai le Iuni o tagata faigaluega i le mine lea ua faailoa ai o le to’atele o i latou e lē o iai ni faamaumauga o faamauina ma isi sa matua’i naunau i le fia maua o ni galuega, e omai mai Mozambique ma isi atunuu Aferika, ua tuu lava e maliliu ai i lea nofoaga ma ua atagia ai le lē lelei o le faafoeina e le faigamalo a Aferika i Saute o lenei mataupu.
E to’atele ua valaau nei ma fesiligia le mafua’aga ua tupu ai lenei faaletonu tele ma ua tatau ona faia iai se su’esu’ega.
Puna o Faamatalaga: https://edition.cnn.com/2025/01/15/africa/south-africa-horrific-clampdown-of-miners-intl/index.html
