Ua talimalo le Ofisa o le Komesina o Sulufaiga i Samoa i lenei vaiaso i le malaga asiasi mai o le Komesina o Sulufaiga o le Malo o Niu Sila, ma le faamoemoe o le asiasiga lenei o le a faatino ai e le Komesina le afioga Misa Peter Boshier, ma lana aumalaga ni aoaoga i tomai e faia ai ni sailiiliga ma ni suesuega mo le aufaigaluega a le Ofisa o le Komesina o Sulufaiga i Samoa.
O le Aso Gafua o lenei vaiaso ua amata ai lea asiasiga i se ava o le feiloaiga, ona sosoo ai lea ma ni feiloaiga ma le taitai o le Malo i le tamaitai Palemia, faapea le afioga i le Ao o le Malo.
O le amataga foi o lenei vaiaso ua talimalo ai lo tatou Malo ma le atunuu i le malaga asiasi mai o le tamaitai Kovana Sili o Niu Sila o ia o le sui o le Tupu Tamaitai o Peretania le afioga Dame Cindy Kiro, ma o le a feiloai atu foi i le Ao o le Malo, o le Palemia ma Minisita o le Kapeneta.
O le a ia faia foi se faalauiloa mo le faasaoina o le manulele a Samoa le tatou lupe o le Manumea. O le a amata le asiasiga a le tamaitai Kovana Sili i le asiasia o le tulai faaaloalo a le vasega o alii ma tamaitai Malu o le Malo, lea e faia i lumā maota o le Malo o Fiame Mataafa Faumuina Mulinuu II, i le taeao o le Aso Gafua o lenei vaiaso fou ma lenei masina fou o Setema.
