O le toe tatala ai o ofisa o le Malo ma pisinisi i le aso Lua o lenei vaiaso ina ua maea le aso malolo i le Aso Gafua na faamamalu ai le Aso Sa o le Lotu a Tamaiti o lenei tausaga, na feiloai ai le kapeteni filifilia o le tatou au lakapi liki o le Toa Samoa le susuga Jerome Luai, ma le taitai o le Malo le afioga i le tamaitai Palemia, Fiame Dr Naomi Mataafa.
O se feiloaiga na ave ai faamanuiaga a le tamaitai Palemia i le kapeteni ma le au atoa o le Toa Samoa ao sauni i lana malaga i Peretania. O le malaga mai i le atunuu o le kapeteni na feiloai ai foi ma le Peresetene ma le pulega o le taaloga lakapi i Samoa mo nisi o fuafuaga ao lei tolauapi faatasi le au a le Toa Samoa ua filifilia. Na faailoa mai e le pelesetene o le lakapi i le atunuu o se fuafuaga faaleaiga na malaga mai ai Jerome Luai i Samoa i le faaiuga o le vaiaso ua mavae, ma maua ai le avanoa e feiloai atu i le taitai o le Malo ma nisi o taitai o le taaloga lakapi liki i lo tatou atunuu.
