Ua afea muamua e le taitai o le Malo le afioga i le Tamaitai Palemia, Fiame Naomi Mataafa, le setete o Hawaii mo le auai i le fono lona 12 a taitai o le Pasefika ma sui o le Malo o Amerika, lea na faamae’a i le ogatotonu o lenei vaiaso.
E uma lena ona faaauau ai lea o le faigamalaga i le atunuu o Kanata mo le auai atu i le fono faavaomalo e ta’ua o le Pan Commonwealth Conference e amata usuia i le faaiuga o le vaiaso nei mo le lua aso.
O le fono lona 77 a Malo Aufaatasi o le a faaiu iai ma o lea faatasiga a taitai o Malo Aufaatasi i le aai o Niu Ioka e usuia i le aso 25 o le masina nei o Setema.
O le afiafi o le Aso Tofi nei na faato’a faailoa mai ai e le Ofisa o le sooupu a le Malo ia faatasiga tetele e tolu o loo auai ai le Palemia o le atunuu, i le tuanai o le 5 aso talu ona tuua Samoa e le taitai o le Malo ma lana aumalaga, o loo aofia ai le Ofisa Sili o le Matagaluega o le va i fafo ma fefaatauaiga ma se Malu o le Malo sinia mo le vaaia o le puipuiga o le saogalemu o le tamaitai Palemia.
O le mae’a o le fono a Malo Aufaatasi o le a mafuta atu ai le tamaitai Palemia i le feiloaiga ma le Peresetene o Amerika e pei ona valaaulia ai ma isi taitai o malo o le Pasefika.
