O le kolisi o A’ana ma le aoga mo ē logonoa le SENESE sa afea e le afioga i le Kovana Sili o Ausetalia le susuga David Hurley ma lona faletua o Linda Hurley i le aso muamua o le la asiasiga taualoa i Samoa.
O le tulai faaaloalo a Malu o le Malo poo leoleo ma le afioga i le tamaitai Palemia na faafeiloaia le faigamalaga mamalu ina ua tauanuu i le malaevaalele faavaomalo i Faleolo i le afiafi o le Aso Lulu.
O le tali faaaloalo a le Kovana Sili ma lona faletua sa faia i le maota o loo faamautu ai le sui o lea Malo mo Samoa, na faalauiloa ai e le Kovana Sili ia Hurley se tasi o polokalame ua ta’ua o le Change Maker sa faatupe e le fesoasoani mo galuega tusitala ma faasalalau a le Malo le PACMAS, ua faamauina ai i se ata faasolo i televise le talaaga o nisi o alo ma fanau a Samoa, ua latou faaaoga o latou tomai ma agavaa faapea taleni e faia ai ni suiga mo le tatou atunuu.
O i latou sa filifilia mo lea polokalame o loo iai o latou agavaa ma tomai i taaloga, o galuega faatusitala, ma i latou e iai manaoga tumau o le tino.
