O le afioga i le Sui Palemia le afioga Tuala Tevaga Iosefo Ponifasio, o le saunoaga aami lea o le a momoliina se faafetai ma se faamalo, i tagata faigaluega uma a le Malo o Samoa, i le faamanatuina i le Aso Faraile le faaiuga o lenei masina o Setema, o le aso faavaomalo o tagata faigaluega a le Malo.
E faamanatu i tausaga uma lenei aso tāua, ma o se aso e amanaia ai ma le tautua matavela a nisi o tagata faigaluega sinia ua leva tausaga o galulue ma tautua le atunuu e ala i matagaluega ma faalapotopotoga eseese a le Malo o loo auauna ai.
O le solo tele a tagata faigaluega a le Malo, o le a amata ai polokalame o lea aso faamanatu o le a taunuu i lumāmaota o le Malo i Matagialalua i le eleele fou, ona faia ai lea o le sauniga lotu faafetai ma le saunoaga autu o le aso.
O le aoauli i le taimi o malologa o vai’aiga o le Aso Faraile e oo i le 5 i le afiafi o le a alo ai le aufaigaluega a le Malo i polokalame eseese ua tapena e matagaluega ma faalapotopotoga a le Malo.
O le sini poo le autu o le aso faamanatu o tagata faigaluega a le Malo o lenei tausaga, o le “Agaga Tautua” poo le “Spirit of Service”.
