Ua lipotia mai nei le faaopoopo atu o se isi auaunaga faalesoifua mālōlōina a Niu Sila i le faafitauli o le aafia ai o faamatalaga ma faamaumauga a tagata e aotova’a atu mo togafitiga ma siaki i gaioiga solitulafono o le ave faagaoi ai o ia faamaumauga tāua tauala i auala faatekonolosi-cyber attack.
O lea auaunaga ua ta’ua o le Canopy Health, ma o se auaunaga tuma’oti aupito i telē lea i le atunuu ua aafia i ia gaioiga; peita’i o le mea mata’utia i lenei mataupu, o le toatele o gasegase ma tagata lautele faatoa faailoa atu iai latou le mea ua tupu a ua atoa le 6 masina talu ona alia’e mai o lenei mataupu.
Faamaonia e le auaunaga a le Canopy Health o le aso 18 o Iulai 2025 na o latou faamauina ai gaioiga nei o le taumafai e ‘ave faagaoi o faamaumauga ma le su’esu’eina e aunoa ma le faatagaga o faamaumauga a gasegase (unauthorised access to part of its administrative systems) i le mae’a ai o so latou iloiloga a ‘au su’esu’e i mataupu faatekonolosi- forensic review by cybersecurity experts.
Ma o sailiiliga a i latou ‘au popoto, na fautuaina ai le auaunaga e tusa ai ma se faalētonu i le server- o loo iai masalosaloga e iai se tasi o loo fai ma alu ai i totonu e auanoa ma le faatagaga, ma ua iai ni faamaumauga ua uma ona aveese ni kopi.
Ua faaalia e lea auaunaga tuma’oti ua mafai ona fo’ia lea mataupu peita’i o loo faaauau pea su’esu’ega.
O le Canopy Health o se auaunaga e 24 itula o faatino mai mo gasegase o le kanesa.
Puna o Faamatalaga: https://www.rnz.co.nz/news/national/583813/second-health-provider-canopy-health-hit-in-major-cyber-attack
