Ua molimau nisi o pasese i le aufaasalalau i le asō i le taimi na iai sina fepa’ia’i minor collision o vaalele e lua a le Qantas i le po anapo i le malaevaalele i Perth.
O le faigamalaga 939 mai Canberra na tulaueleele atu i lona Gate ae aafia atu ai ma le apaapa o le isi vaalele sa i autafa ane.
Lipotia na faalogoina e le pasese le tulaga lea a o sauni e agai ese mai mai le vaa lea ma sa faatonuina ai e toe foi i o latou nofoa.
Molimau nisi na faalogoina se pao leotele ma maluelue ai le vaa.
I se taimi mulimuli ane na faailoa ane ai e le pailate e na o le apaapa o le isi vaalele ua aafia ae lē o iai se suauu o liki poo se isi faaletonu.
Faamaonia mai e le malaevaalele i Perth e leai se pasese na faamanu’alia ma ua tutū uma nei vaa ia e lua se’i fai le suesuega.
Fai mai se tasi pailate a le Qantas o ituaiga mataupu faapea e seasea tupu ma e laititi foi se mea ua faaleagaina.
