E oo atu i le 700 faigamalaga a pasi i Aukilani na aafia i le taeao nei ona o le tetee a avepasi.
Taimi pisi o le taeao mai le itula e 4 e oo mai i le itula e 8 lea na leai ai ni pasi feoai a le NZ Bus a o faia ai le tetee ma o se tetee foi ua faamaonia mai e le Auckland Transport na tuai ona logoina ai i latou e le kamupani pasi a le NZ Bus faapea le iuni.
O se faanoanoaga i le Auckland Transport le faaiuga na aafia ai faigamalaga a pasi i le taeao nei, ona e le gata ua tupu i le taimi ua toe amata toatele ai tagata feoai e faaaogaina auaunaga a pasi ae o le aafia ai o le faitau afe o tagata Aukilani.
O totogi lava lea e le o fiafia ai le kamupani pasi ma o loo finau e tatau ona sili atu totogi o avepasi o loo feoai i Aukilani na i lo totogi ua faatulaga mo auaunaga a avepasi.
I se tali mai a le Auckland Transport o loo iai le faamoemoega ia vave maua se tali o le faafitauli i le asō ina ia gata ai i le taeao nei le tetee ae aua ne’i vaiaso atoa.
Ua molimau mai ai foi ma le sui o le Auckland Transport o loo galulue pea e feutaga’i ma le Auckland Council faapea le malo mo se isi tupe faaopoopo ina ia mafai ai ona faaopoopo totogi o avepasi Aukilani.
Afai ae uma le aso e leai se tali faamalieloto mo le iuni ma le NZ Bus, o lona uiga e toe leai foi ni pasi e feoai a le NZ Bus i le taimi lava foi faapenei a taeao faasolo atu i le Aso Tofi.
