Ua faaleo se finagalo mai le NSW Teachers Federation e tauala mai lo latou faauluuluga o Angelo Gavrielatos e faapea e faitau afe ma afe o tamaiti a’oga ua misi a latou a’oa’oga i aso ta’itasi ona o le faatupula’ia pea o le faafitauli o le leai poo le sioti o faia’oga.
O se lipoti fou ua faalauiloa mai i le vaiaso nei lona i’uga ua ta’ua ai toeititi 60 pasene o faia’oga o loo fuafua e aga’i ese mai ma le auaunaga i totonu o le isi lima tausaga ma e manatu le Federation o se tulaga lea e lē tatau lava ona tulai mai.
O le finagalo faaalia o le Federation ua alagatatau i le malo ona faia se fuafuaga i le lumanai o tamaiti a’oga. Fai mai a latou o aso uma e faailoa ai e le faitau afe o tamaiti aafiaga o le faafitauli o le leai o ni faia’oga ia latou foi su’esu’ega ma o le tulaga o loo iai nei, a lē tuufaatasia isi vasega pe ua faalēaogāina foi lea piliota a o taumafai ai le pulega e fai se gaioiga e foia ai faafitauli.
Fai mai Gavrielatos e foliga mai e lē o popole lava le malo i le faafitauli ua leva ona faailoa atu e a’oga ma ua tele foi solo tetee ua faia a faia’oga i nai masina e le’i mamao atu ae foliga e lē o lagonaina lava e le faigamalo.
