O lea ua tuuina atu e le aufaigaluega o loo galulue i le Emergency Department agai i le pulega a le falemai i Waikato le Provisional Improvement Notice.
O le Provisional Improvement Notice o se faatonuga faaletulafono lea e faatonuina ai le pulega o le falemai ua tatau ona faia se faiga i le saogalemu ma le soifua maloloina o le aufaigaluega i totonu o le taimi faatapulaa, ma i le mataupu lenei e na o le 9 aso lea ua aumai ai.
O se laasaga tele ua faia e le aufaigaluega a le ED i le falemai i Waikato i le mae’a sau ai o lipoti ua na o le o atu o ambulance i le Aso Gafua ma laina i fafo e faatalitali ni avanoa, ae o le aufaigaluega foi ua lē iloa le mea a fai i le toatele o gasegase pe a faatusa i le aofai o i latou.
O le talosaga aloaia e patino lava lea i le aufaigaluega a le ED i le falemai i Waikato, peitai o loo saini ai foi ma le silia i le 150 o le aufaigaluega o loo galulue i isi vaega o le falemai.
O se faaiuga o loo lagolagoina e le New Zealand Nurses Organisation.
E tatau ona oo atu i le Aso Faraile o le vaiaso fou ua tali mai le pulega a le falemai a Waikato i le Provisional Improvement Notice ma o lea foi ua fai mai le Te Whatu Ora o loo galulue faatasi ma le WorkSafe auā se tali o le talosaga ua tauaao.
